Во една необична правна победа, малолетничка од Калифорнија доби 300.000 долари (околу 278.000 евра) од округот Шаста. Парите се исплатени откако козата, нејзино милениче, заврши трагично во кланица. Козата по име Кедар, која девојчето ја одгледувало со голема љубов, беше одземена по локална аукција во 2022 година.
Ситуацијата се закомплицирала кога девојчето, кое само имало 11 години, не можело да се раздели од Кедар, сфаќајќи дека судбината на животното е кланицата. Нејзината мајка, Џесика Ланг, се обидела да ја откаже продажбата, но организаторите не дозволиле.
Во обид да ја заштити козата, Џесика ја однела на далечна фарма, но полицијата од округот ја обвинила за кражба и спровела потрага по козата. Претресот се случил без налог, според Ланг, што довело до тужба и конечно, спогодба.
„Иако финансиски сме обештетени, срцето на мојата ќерка остана скршено. Ништо не може да ја врати Кедар“, изјави Џесика. Документите од судот откриваат дека девојчето го загуби својот миленик, а козата – својот живот.