На 3 февруари 1959 година, светот на музиката доживеа ненадоместлива загуба. Тројца млади музичари – Бади Холи, Ричи Валенс и Биг Бопер (Џ.П. Ричардсон), заедно со пилотот Роџер Петерсон, го загубија животот во авионска несреќа што засекогаш ќе го промени текот на рокенролот.
“Се надевам дека ќе ти се урне авионот” – последните зборови на Вејлон Џенингс кон Бади Холи, изговорени на шега, кои подоцна ќе го прогонуваат цел живот.
Замрзнат автобус и судбоносна одлука
Турнејата наречена “Зимска денс забава” требало да донесе 24 незаборавни концерти за 24 дена. Наместо тоа, донела една од најголемите трагедии во историјата на рокенролот. Музичарите патувале во стар училишен автобус без греење, што постојано се расипувал. Измачен од тешките услови, Бади Холи одлучил да изнајми мал авион.
Паричка што одлучува за живот
Судбината се кроела со едно фрлање паричка. Биг Бопер, кој бил болен, добил едно место во авионот. За последното слободно место, Томи Алсуп и Ричи Валенс ја оставиле одлуката на случајноста. Едноставна игра на “писмо-глава” определила кој ќе го преживее тој ден.
Последен поздрав и трагичен крај
Авионот “Бичкрафт бонанза” полетал во лоши временски услови. По само неколку минути лет, поради слаба видливост, пилотот изгубил контрола. Никој не преживеал. Трагедијата станала уште поболна кога сопругата на Бади Холи за несреќата дознала преку радио, што довело до промена во начинот на известување за вакви настани.
Бесмртно музичко наследство
Дванаесет години подоцна, Дон Меклин ја овековечил оваа трагедија во легендарната песна “American Pie”. Бади Холи станал еден од првите членови на Рокенрол куќата на славните, а во 2001 година му се придружил и Ричи Валенс. Нивното музичко наследство и денес живее преку бројни документарни и биографски филмови.