Во секојдневниот живот несвесно често преземаме ризици кои можат да имаат катастрофални последици. Д-р Леана Вен, специјалист за итна медицинска помош, идентификува пет најчести активности кои ги загрозуваат нашите животи и поради кои луѓето најчесто завршуваат на итно одделение.
„Многу секојдневни активности што луѓето ги прават без да знаат дека можат да имаат сериозни последици по здравјето и безбедноста.” – д-р Леана Вен
Небезбедно возење електрични скутери и велосипеди
Електричните превозни средства станаа популарен начин за движење низ градовите, но неодговорното користење доведе до драстичен пораст на повредите. Д-р Вен истакнува дека многу возачи ги игнорираат основните безбедносни мерки:
- Не носат заштитни кациги
- Не вршат безбедносни проверки пред возење
- Возат под дејство на алкохол или дрога
- Превезуваат дополнителни патници спротивно на упатствата на производителот
Носењето шлем може да биде разликата помеѓу мала повреда и сериозна траума на главата. Исто така, експертите препорачуваат редовно проверување на сопирачките, гумите и управувачкиот механизам, како и избегнување возење по влажни и лизгави патишта.
Користење телефон за време на возење
И покрај постојаните предупредувања, користењето мобилни телефони за време на возење останува една од најопасните навики во сообраќајот. Секое тргање на погледот од патот, макар и за момент, може да резултира со катастрофални последици.
Д-р Вен нагласува дека ако треба да одговорите на порака или да ја промените рутата на вашата навигација, најбезбедно е да застанете на соодветно место и тогаш да го користите телефонот.
Учество во опасни предизвици на социјалните мрежи
Во ерата на социјалните медиуми, особено младите се привлечени од ризични интернет предизвици кои можат да бидат смртоносни. Еден таков пример е предизвикот „затемнување”, при кој учесниците намерно се задушуваат за да предизвикаат привремено губење на свеста – активност што веќе одзела неколку животи.
Експертот советува внимателно да размислите пред да учествувате во каков било интернет предизвик. Доколку вклучува конзумирање опасни супстанции, ризик од физички повреди или загрозување на други, најдобро е целосно да го избегнувате. Родителите треба отворено да разговараат со децата за овие опасности.
Земање лекови од непроверени извори
Лекарите предупредуваат дека една од најопасните практики е земањето лекови кои не се препишани од здравствен стручњак. Многу луѓе прифаќаат лекови од пријатели или нарачуваат преку интернет, не размислувајќи дека можат да бидат фалсификати или контаминирани со опасни супстанции.
“Земете ги само лековите кои ви се препишани и кои се купени од овластени аптеки,” истакнува д-р Вен, додавајќи дека многу фалсификувани лекови содржат фентанил, супстанција која е 50 пати посилна од хероинот и водечка причина за смртоносни предозирања.
Оставање деца без надзор близу вода
Давењето е водечка причина за смрт кај малите деца. Секоја година се случуваат околу 4.000 вакви несреќи само во САД. Иако безбедносните мерки како оградување на базените и часови по пливање можат да го намалат ризикот, тие не се замена за надзор од возрасен.
Д-р Вен нагласува дека возрасните кои се грижат за деца треба секогаш да бидат присутни и внимателни кога децата се во или близу вода. Исто така, тие не треба да консумираат алкохол или други супстанции кои можат да ја намалат брзината на реакција во итен случај.