Родителите имаат природна склоност да ги заштитат своите деца од сите предизвици и потешкотии во животот. Сепак, психијатрите предупредуваат дека претераната заштита може да има спротивен ефект од посакуваниот – создавање на ментално слаби и зависни личности.
Опасноста од претерано помагање
Според психијатарот Даниел Ејмен, една од најголемите грешки што родителите ја прават е што преземаат премногу обврски наместо своите деца. Ова вклучува работи како:
- Завршување на домашните задачи наместо детето
- Носење на заборавени предмети во училиште
- Давање сè што детето бара за да се избегнат тантруми
Ваквите постапки можеби делуваат како помош во моментот, но долгорочно го попречуваат развојот на детската ментална отпорност и способноста за самостојно функционирање. Истражувањата покажуваат дека децата со висока ментална отпорност имаат значително поголеми шанси да израснат во среќни и успешни возрасни личности.
“Доколку работите премногу наместо вашите деца, тогаш на штета на неговата самодоверба ја градите својата. Менталната сила кај луѓето се развива преку решавање на проблемите” – потенцира психијатарот Ејмен.
Рамнотежа помеѓу поддршка и дозволување на последици
Психијатарот Ејмен објаснува преку примери како изгледа здравиот пристап: “Кога ќерка ми ќе ја заборави домашната задача, никој не ѝ ја носи на училиште. Ако не ја земе јакната и надвор е ладно, и покрај тоа што мајка ѝ ја предупредила, никој нема да ѝ ја однесе јакната.”
Исто така, кога детето се жали на здодевност, наместо веднаш да понудиме забава, подобар пристап е да го потикнеме самостојното размислување: “Се прашувам што ќе правиш во врска со тоа?”
Градење отпорност не значи суровост
Детскиот психолог Това Клајн нагласува дека градењето на ментална издржливост кај децата не подразбира груб пристап од страна на родителите. Меѓутоа, заштитата на децата од секакво разочарување е еднакво штетна.
Клучот е во балансот – децата треба да доживеат разочарувања, пречки и да прават грешки, но со постојана емоционална поддршка од родителите. Овој пристап им праќа силна порака на децата дека родителите веруваат во нивните способности и дека се присутни да помогнат дури и кога работите стануваат тешки.
Како да поттикнете ментална сила
Психијатрите препорачуваат:
- Дозволете им на децата да се соочат со последиците од своите постапки (кога тие се безбедни)
- Поттикнувајте самостојно размислување и решавање проблеми
- Не брзајте да интервенирате при секоја потешкотија
- Обезбедете емоционална поддршка, не решенија
“Пуштете ги сами да размислуваат за своите проблеми или решенија за проблемите, наместо претерано да се мешате во тоа”, заклучува Ејмен.